20 ஆயிரம் ஆசிரியர்களுக்கு பயிற்சி: பல்கலை பணியாளர் கல்லூரி சாதனை

சென்னை பல்கலை பணியாளர் பயிற்சி கல்லூரி, இதுவரை 20,000 கல்லூரி ஆசிரியர்களுக்கு பயிற்சி அளித்து சாதனை படைத்துள்ளது.

தேசிய கல்வி கொள்கையின் படி,  பல்கலைகழக மானியக் குழுவின் கல்வி பணியாளர் கல்லூரி (யு.ஜி.சி., அகடமிக் ஸ்டாப் காலேஜ்) 1986ம் ஆண்டு பல்கலைக்கழகங்களில் துவங்கப்பட்டது. ஆசிரியர்களின் கற்பித்தல் திறனை மேம்படுத்துதல், காலத்திற்கேற்ப மாறி வரும், பாடத்திட்டத்தின்படி ஆசிரியர்களை தயார்படுத்துதல், ஆளுமை திறனை வளர்த்தல், சமூகம், பொருளாதாரம், சுற்றுச்சூழல், கல்வி ஆகியவற்றில் ஏற்படும் மாற்றங்கள், கணினியில் ஏற்படும் வளர்ச்சி மற்றும் அதை கல்வியில் பயன்படுத்துவது குறித்து, பணியாளர் கல்லூரியில், பல்கலை மற்றும் கல்லூரி ஆசிரியர்களுக்கு பயிற்சி அளிக்கப்படுகிறது.

சென்னை பல்கலை கல்வி பணியாளர் கல்லூரி இயக்குனர் (பொறுப்பு) கோதண்டராமன் கூறியதாவது:  இடைநிலை ஆசிரியர் பயிற்சி, பட்டதாரி ஆசிரியர் பயிற்சிகள் முடிந்த பிறகே, பள்ளிகளில் ஆசிரியராக பணிபுரிய முடிகிறது. ஆனால், கல்லூரிகளில் எந்தவித பயிற்சியும் இல்லாமல், நேரடியாக ஆசிரியராக சேருகின்றனர்.

முறையான பயிற்சி இல்லாத காரணத்தால், மாணவர்கள் கவனிக்கும் வகையில் வகுப்புகள் எடுப்பது, மாணவர்களுடன் பழகும் முறை தெரியாமல் போகிறது. இதை போக்கும் வகையில், பணியாளர் கல்லூரி செயல்படுகிறது. கடந்த 25 ஆண்டுகளில், 20,000 ஆசிரியர்கள் இக்கல்லூரியில் பயிற்சி பெற்றுள்ளனர். இவ்வாறு கோதண்டராமன் கூறினார்.